Turqia shpall Rugovën “Doctor Honoris Causa”

Senati i Universitetit Publik të Turqisë, “Eskisehir Osmangazi Universitesi”, në mbledhjen e mbajtur më datën 30.5.2012, ka marr vendim që rektorit të Universitetit të Prishtinës, prof. dr. Mujë Rugova të i ndahet titulli “Doktor Honoris Causa” nga ky universitet.

Siç njoftoi Univeristeti i Prishtinës, në vendimin e Senatit të Universitetit turk, thuhet se “Rektorit të Universitetit të Prishtinës, prof. dr. Mujë Rugova, i ndahet titulli “Doktor Honoris Causa” për:

-    Kontributin e tij dhënë në fushën e arsimit të lartë dhe menaxhim cilësor,
-    Kontributin e nënshkrimit dhe jetësimit të marrëveshjeve në mes të Universiteteve turke dhe Universitetit të Prishtinës,
-    Nënshkrimin dhe jetësimin e marrëveshjes me qëndren për kulturë Yunus Emre
-    Kontributin e dhënë në zhvillimin dhe avancimin e marrëdhënieve Kosovë-Turqi.

Vendimi i është dërguar ambasadës së Republikës së Kosovës në Ankara dhe ajo sot e ka dërguar në Universitetin e Prishtinës.

Universiteti “Osmangazi Universitesi” është një nga universitetet më prestigjioze të Turqisë i cili shquhet dhe është i njohur për arritjet në fushën e mjekësisë dhe farmacisë.

Në këtë universitet publik, studiojnë më shumë se 20 mijë studentë.

Dhënia e titullit “Doktor Honoris Causa” rektorit të UP-së, prof. dr. Mujë Rugova, është një nga pasqyrimet e mira qe i është bërë Universitetit të Prishtinës në aspektin ndërkombëtar gjatë menaxhimit të UP-së nga rektori Rugova, njofton UP.

“Po ashtu ky titull pasqyron cilësin menaxhuese dhe imazhin pozitiv qe është krijuar për Universitetin e Prishtinës nga ana e prof. dr. Mujë Rugovës, si rektor i këtij universiteti”, thuhet në komunikatë.

(KosovaTimes)