FSK zhvilloi trajnimin me helikopterë

Forca e Sigurisë së Kosovës(FSK) dhe kontingjenti turk i  KFOR-it, për dy ditë, kanë kryer trajnime të përbashkëta, me helikopter, në terrenin e Kazermës  “New Born”të FSK-së, në Gjilan.

“Në këtë ushtrimin kanë marrë pjesë tridhjetë e katër pjesëtarë të FSK-së, 21 pjesëtarë nga Kompania e Kërkim-Shpëtimit e Regjimentit të Mbrojtjes Civile (RMC) si dhe 13 pjesëtarë nga Njësia Ndërlidhëse e Reagimit të Krizave (NJNRK)”, është thënë në një komunikatë për media nga FSK-ja.

Po ashtu në  këtë komunikatë është thënë se trajnimi ka filluar më 28 maj dhe ka përfunduar më 29 maj 2012, kurse  temat më të rëndësishme kanë qenë; plotësimi i kërkesë për evakuim mjekësor, ngritja dhe zbritja me pacientë nga helikopteri, përzgjedhja dhe përgatitja e terrenit për aterrim, etj.

Për të përcjellë nga afër trajnimin e pjesëtarëve të FSK-së, mori pjesë edhe komandanti i Brigadës për Mbështetje Operacionale, kolonel Ilaz Dërguti, me bashkëpunëtorë.

Me këtë rast, kolonel Dërguti ka falënderuar pjesëtarët (pilotët) e KFOR-it turk, majorin Ozcan Kuzeyi dhe ndihmësit e tij, për angazhimin dhe punën e palodhshme që po bëjnë për trajnimin dhe aftësimin e pjesëtarëve të FSK-së, për t’u dalë në ndihmë qytetarëve, në raste emergjente, ndërsa i ka inkurajuar pjesëtarët e FSK-së, për trajnime sa më cilësore dhe të jenë të vëmendshëm, pasi është hera e parë që pjesëtarët e FSK-së, po marrin pjesë në një ushtrim të tillë.

Pas përfundimit të ushtrimit, të gjithë pjesëtarët e FSK-së, janë pajisur me certifikata.  
 

(KosovaTimes)